AQP-də qeyri-maddi aktivlərin qiymətləndirilməsi üzrə ixtisaslaşdırılmış təlim-seminar

Azərbaycan Qiymətləndiricilər Palatasında (AQP) qeyri-maddi aktivlərin qiymətləndirilməsinə həsr olunmuş təlim-seminar təşkil edilib. Tədbirdə Palatanın rəhbərliyi, ixtisaslaşmış qiymətləndiricilər və sektor nümayəndələri iştirak ediblər.

AQP sədri Nüsrət İbrahimov bildirib ki, brend dəyəri, müəllif hüquqları, patentlər, proqram təminatı, kommersiya nüfuzu və digər qeyri-maddi aktivlərin düzgün qiymətləndirilməsi strateji qərarların qəbuluna birbaşa təsir göstərir. O vurğulayıb ki, qiymətləndiricilərin beynəlxalq metodologiyalara bələd olması və müasir qiymətləndirmə alətlərindən istifadə etməsi peşəkar fəaliyyətin keyfiyyətini artırır.

Təlim zamanı qeyri-maddi aktivlərin identifikasiyası, dəyərin müəyyənləşdirilməsi, bazar, gəlir və xərc yanaşmalarının tətbiqi, risklərin qiymətləndirilməsi və praktik çətinliklərin aradan qaldırılması geniş şəkildə izah olunub. İştirakçılar real nümunələr üzərində qiymətləndirmə prosesini analiz edib, müxtəlif iqtisadi sektorlar üzrə tətbiq edilən qiymətləndirmə modellərini müzakirə ediblər.

AQP İntizam Komissiyasının sədri Nahid Həsənov peşə etikası, obyektivlik və şəffaflığın bazar iştirakçıları arasında etimad yaratmaq üçün vacib olduğunu bildirib. Təlimə ixtisas imtahanlarında uğur qazanmış qiymətləndiricilər qatılıb, interaktiv müzakirələrdə beynəlxalq təcrübənin yerli bazara uyğunlaşdırılması və praktiki problemlərin həlli məsələləri ətraflı işlənib.

Qeyd edilib ki, bu kimi təlim və seminarlar qiymətləndirmə sahəsində peşəkar biliklərin artırılmasına, beynəlxalq standartların öyrənilməsinə və institusional inkişafın güclənməsinə xidmət edir. AQP gələcəkdə də ixtisasartırma proqramlarını davam etdirərək qiymətləndiricilərin səviyyəsini yüksəltməyi və bazarın inkişafına dəstək verməyi planlaşdırır.